თამარ შიუკაშვილის ნახატების გამოფენა „ღია გალერეაში“
 


21 ივნისს, 18:00 საათზე, „ღია გალერეა" ქართველი მხატვრის თამარ შიუკაშვილის ნახატების გამოფენას უმასპინძლებს, რომელიც ბავშვთა ჰოსპისს „ციცინათელების ქვეყანას" ეძღვნება. თამარის ნახატები ნებისმიერ შემთხვევაში დადებით ემოციას იწვევს და კარგ განწყობას ქმნის. მისი პერსონაჟების და თემების მრავალფეროვნების წყალობით თამარის ნამუშევრების ადგილი ყველგან მოიძებნება.

როგორც თავად თამუნა ამბობს, მისი ნამუშევარი სერიოზული სახით არავის უყიდია.  „ღიმილით მოდიან და ღიმილითვე მიდიან".

ნახატების გაყიდვის შემთხვევაში, თანხა ბავშვთა ჰოსპისს „ციცინათელების ქვეყანას" გადაერიცხება.

გთხოვთ დაგვიდასტუროთ დასწრება ფეისბუქზე შექმნილ ღონისძიების გვერდზე.

ბავშვთა ჰოსპისის „ციცინათელების ქვეყანა" შესახებ

"ციცინათელების ქვეყანა" ოჯახური ტიპის პალიატიური მზრუნველობის ცენტრია, რომელიც საქართველოში 2017 წლის იანვარში გაიხსნა. ჰოსპისში უფასოდ ემსახურებიან ქრონიკული და უკურნებელი სენით დაავადებულ ბავშვებს და მათ ოჯახებს.  24 საათიანი მომსახურება ერთდროულად 10 ბავშვისა და მშობლისთვის არის შესაძლებელი, პარალელურად ფუნქციონირებს დღის ცენტრი და შინ ზრუნვის სამსახური ბინაზე მყოფი პაციენტებისთვის.

ბავშვთა ჰოსპისის მშენებლობა 2015 წლის ოქტომბერში ფონდი „ღია საზოგადოება-საქართველოს" ინიციატივით, "სამედიცინო კორპორაცია ევექსის" პირველი ფინანსური შენატანით და საქართველოს პრეზიდენტის სარეზერვო ფონდის დახმარებით დაიწყო. მას შემდეგ, ჰოსპისს ასობით დონორი გამოუჩნდა რიგითი მოქალაქეების და ბიზნესკომპანიების სახით. ერთი წლის მანძილზე ჰოსპისის მშენელობისთვის 1 მილიონ ლარზე მეტი შეგროვდა. 

თბილისის ბავშვთა ჰოსპისი საერთაშორისო გამოცდილების მიხედვით შეიქმნა და ის სრულიად შეესაბამება საერთაშორისო სტანდარტს მომსახურე პერსონალის კვალიფიკაციის, არქიტექტურული დაგეგმარების, ინტერიერის და საწოლების რაოდენობის მიხედვით. საქართველოს ჰოსპისის კონცეფცია არჩილ სულაკაურის „სალამურას თავგადასავალის" მიხედვით შემუშავდა. სწორედ ამ კონცეფციის ნაწილია ჰოსპისის სახელწოდება და გარემო, რომელიც ზღაპრულ სამყაროს მოგაგონებთ.

ბავშვთა პალიატიური მზრუნველობა გულისხმობს განუკურნებელი და ქრონიკული დაავადებების მქონე ბავშვებზე ზრუნვას. პალიატიური მზრუნველობა მოიცავს, როგორც დაავადებით გამოწვეული სიმპტომების შემსუბუქებას, ასევე ბავშვისა და ოჯახისათვის ფსიქოლოგიური და  სულიერი მხარდაჭერის გაწევას. პალიატიური მზრუნველობის საჭიროება მაშინ დგება, როდესაც საქმე გვაქვს ისეთ დაავადებებთან, რომელიც მკურნალობას არ ექვემდებარება.. ბავშვებში, ასეთი დაავადებებია კიბოს ბოლო სტადია, დიაბეტი, სხვადასხვა ნევროლოგიური დაავადებები, ცერებრალური დამბლის მძიმე ფორმები და სხვა.  მოზრდილებისგან განსხვავებით, პალიატიური მზრუნველობის საჭიროების მქონე ბავშვებს სხვა ტიპის მიდგომა სჭირდებათ.

ჰოსპისის უმთავრესი პირობა ოჯახური ტიპის გარემოს შექმნაა. ამიტომ, ევროპის ბევრ ქვეყანაში, ჰოსპისი მცირე ზომის,  მაქსიმუმ სამსართულიან სახლებშია განთავსებული. მსოფლიოში ბავშვთა ჰოსპისების ბევრი წარმატებული მაგალითი არსებობს. ამ მხრივ, დიდი გამოცდილების მქონე ქვეყნებია ჰოლანდია, გერმანია, ინგლისი, ამერიკა და რუმინეთი. არის ჰოსპისები, რომლებიც რომელიმე ლიტერატურული პერსონაჟის სახლს ან წარმოსახვით სამყაროს მოგაგონებთ.

საქართველოში პალიატიური მზრუნველობის დანერგვას და განვითარებას 1999 წლიდან ხელს უწყობს ფონდი "ღია საზოგადოება-საქართველო".   

 

 


კვ ორ სა ოთ ხუ პა შა
            1
2 3 5 7 8
9 10 11 12 14 15
16 17 18 19 20 21 22
23 24 25 26 27 28 29
30